كانت بتصحى بدري كل يوم الصبح، بتركب عربيتها، وتسوق أكتر من 20 دقيقة- غالبا أكتر من ساعة عشان الزحمة- لحد ما توصل الشغل. بتقعد في المكتب قدام الكمبيوتر لاكتر من 8 ساعات تشتغل كمحاسبة لحد ما تروح الساعة 6 بالليل. مكنتش سعيدة في حياتها، ومكنتش بتتقدم في شغلها، بس مكنتش حاسة ان في اي فرصة للتغيير، خاصة ان بقالها اكتر من 10 سنين في نفس المجال. وفي يوم بعد الشغل، خرجت مع اصحابها، واقترحوا عليها انها تبدأ مدونة خاصة بها، لانها كاتبة كويسة جدا. وبالرغم من انها كانت خايفة تحول هوايتها لوظيفة، كان ده أحسن قرار اخدته في حياتها. دلوقتي هي كاتبة مستقلة، مسؤولة عن مدونة بتنشر فيها مقالاتها، و بتكتب كتب بتحقق نجاح كبير. صحيح أن تغيير المسار المهني ممكن يكون صعب، بس جوبزيلا هتقدملك دليل يساعدك تعرف امتى تكون محتاجه و ازاي تحققه.
اكتشاف طريقك المهني بيشكل تحدي، و انك تعرف الشغل اللي انت عايز تعمله و فين، بياخد وقت طويل و تفكير كتير. و بالرغم من أن بعض الناس بتكتشف طريقها في أول حياتها، إلا انه من الشائع أنهم يغيروا مسارهم بعدين. معظم الناس اللي غيرت مسارها قالوا ان القرار كان صعب جدا، الا انه كان بيستحق التفكير و التعب. ازاي ممكن تنجح في تغيير المسار المهني و تبدأ في مجال عمل مختلف تماما؟ جاوب على الاسئلة ده، و خلي افكارك توجهك عشان توصل للي انت عايزه.
1. ليه أنا عايز امشي؟
قيم وظيفتك الحالية، و حدد ايجابيات و سلبيات انك تشتغل في المكان اللي انت فيه. مهم جدا انك تكون قرار مبني على أسباب و أسس مقنعة عشان تمشي. و قبل ما تقرر، حدد أهدافك و الاسباب اللي تخليك تدور على فرصة جديدة. من ناحية تانية، لما تحلل موقفك ووضعك الحالي، ده هيساعدك تعرف ايه هي المشاكل اللي بتواجهك، عشان تتجنبها في شغلانتك الجديدة. اكتب الحاجات اللي بتكرهها في وظيفتك، و الحاجات اللي انت مش راضي عنها، بس اكتب كمان الحاجات اللي انت بتحبها في وظيفتك. بعد كدة، فكر كويس، وقيم خياراتك عشان توصل لقرار واضح انك يا اما تفضل في وظيفتك، او تنقل لوظيفة تانية، أو تبدأ في تغيير المسار المهني ومجال عملك كله لمجال تاني جديد.
2. أنا عايز اعمل ايه؟
بعد ما تقرر انك مش عايز تفضل في وظيفتك، وانك عايز تنقل لمجال جديد، دلوقتي لازم تفكر في ايه اللي انت عايز تعمله. اكتب افضل خياراتك، و الانشطة او الهوايات اللي انت بتحب تعملها. بكدة، انت بتعيد اكتشاف نفسك، و بترسم لنفسك طريق جديد تؤدي فيه وظيفة تكون مستمتع بها و بتحبها حتى لو كانت صعبة. خالي بالك، متخترش هوايات ميكونش عندك المهارات و القدرات اللازمة عشان تعملها. بمعني آخر، انت دلوقتي عايز تعمل تغيير المسار المهني وهتبدأ وظيفة جديدة في مجال معندكش فيه اي خبرة، فعلى الاقل لازم يكون عندك المؤهلات اللي تساعدك انك تتطور و تنجح فيه. في النهاية، انت مش عايز تبدا تجربة جديدة تكون مش راضي عنها زي اللي قبلها.
3. أنا عايز اروح فين؟
ده حاجة مهمة بردو لازم تحددها. هنا انت بتكتب الشركات و الاماكن اللي عايز تشتغل فيها. فكر في الشركات الكبيرة و الصغيرة كمان، و بعديها اتفرج على موقعهم الالكتروني و شوف الوظائف الشاغرة اللي عندهم اللي انت ممكن تقدم فيها. دور كمان على المشاريع او الشركات اللي بدأت جديد، لانهم أحيانا بيوفرولك تدريب وبيساعدوك انك تكبر في المجال اللي انت فيه و تحقق نجاح معاهم. و ممكن تسأل على الاماكن اللي بتوفرلك تدرييب كويس و بتوافق انك تشتغل بدون خبرة سابقة. من ناحية تانية، أحيانا في بعض الشركات بتساعدك تكتشف ذاتك، و تعمل تغيير المسار المهني، و تكبر في المجال الجديد اللي انت اختارته.
4. ازاي ممكن احقق تغيير المسار المهني؟
في الخطوة ده انت هبدأ خطة عمل. ده معناه انك هتحط اهداف و خطوات قصيرة المدى تساعدك انك توصل لهدفك الجديد. ممكن تحدد لنفسك مهام يومية او اسبوعية عشان تكتسب المعرفة، و المهارات و الخبرة اللي انت محتاجها عشان تساند عملية تغييرالمسار المهني، و تديك بداية قوية. فكر في الكورسات، فرص التدريب أو حتى الأعمال التطوعية، كتجربة تعرفك ازاي الشغل بيكون في المجال ده، و كمان تثبت معرفتك به من خلال الشهادات اللي هتاخدها أو الشغل اللي هتعمله. بعض الأشخاص بيشتغلوا بشكل مستقل لفترة معينة في المجال الجديد، زي ما حد يبدأ مدونة عشان عايز يبقى كاتب، او يقبل مشروع كمبرمج أو منسق أفراح، او يحضر حفلات عشان يشتغل كمصور. وده في النهاية، بيديهم خبرة، و بيعرفهم ظروف الشغل.
5. مين ممكن يساعدني في عملية تغيير المسار المهني؟
انت داخل مجال جديد و مختلف عن اللي تعرفه، عشان كدة انت محتاج توجيه و دعم من ناس انت تعرفهم و بتثق فيهم. دور و اكتب شبكة معارفك و اتصالاتك اللي من خلالها هتبدأ اول خطواتك بثبات في طريقك الجديد. الناس ده ممكن يكونوا أشخاص بيشتغلوا في المجال ده و هيعرفوك منين تبدأ و ازاي. وممكن يكونوا أشخاص عارفين قدراتك و امكانياتك بحيث يقدروا يساعدوك تزود مؤهلاتك لأفصى قدرة ممكنة. والناس دول بيتنوعوا من اساتذتك في الجامعة ومستشارينك الاكاديميين، لمديرك في الشغل و شركائك السابقين أو حتى زملاؤك. في النهاية، لازم تحدد خطواتك الجاية، و شبكات اتصالاتك و معارفك، عشان تفضل مركز و تمشي صح.
6. امتى ممكن ابدأ عملية تغيير المسار المهني؟
ادرس خطتك كويس، وحدد الموارد و المصاريف اللي انت محتاجها عشان تنفذ الخطة. فكر في تكلفة الكورسات و الورش أو التدريبات اللي انت هتاخدها. وفكر كمان في المتطلبات الجسدية و العقلية عشان تاخد تدريب، او تبدا وظيفة بدوام جزئي او حتى عمل تطوعي. وركز في الخيارات اللي قدامك، هل ممكن تسيب وظيفتك الحالية عشان تجهز نفسك للوظيفة الجديدة، و لا انت محتاج تفضل في الوظيفة عشان تصرف على المتطلبات المادية لتجهيزك للمجال الجديد؟ وده بيعتبر من اهم الخطوات في عملية تغيير المسار المهني عشان بيجنبك انك تبدأ بداية غلط بسبب الخطوات اللي مش مدروسة، و القرارات العشوائية اللي انت اخدتها بشكل متسرع. حتى لو الخطوة ده اخدت وقت اطول او مجهود اكبر، هتقلل توترك، و تمنع الشكوك و المخاوف من المجهول.
في النهاية، و بالرغم من ان تغيير المسار المهني بيبقى مخيف، وان معظم الناس بتحب تفضل في المكان اللي تعرفه، و تؤدي الوظيفة اللي اتعودت عليها، احيانا التغيير بيبقى انسب حل ليهم، و بيغير حياتهم للافضل. وبغض النظر عن المدة اللي انت فضلت تشتغل فيها في نفس الوظيفة، ايا كانت، انك تكتشف نفسك من جديد و تغير لطريق مناسب ليك اكتر، ده هيخليك مبسوط و راضي عن نفسك. متخافش و ابدا في التغيير لو كان ده افضل قرار عشان تحسن من نفسك و شغلك.
إكتشف مع جوبزيلا أهم الوظائف الجديدة في المجالات المختلفة:
وظائف في مجال الفنون، التصميم و الإبداع
