طيب ثانية واحدة….مين نينا مفلح؟
اللي بهر عالم الإنترنت الواسع إن نينا مفلح، بنت أردنية جميلة، كانت عايزة حاجة واحدة وهي إنها تشتغل في شركة Airbnb بأقصى سرعة بعد ما سابت الشرق الأوسط ونقلت حياتها لسان فرانسيسكو، أرض كل شركات التكنولوجيا الكبيرة.
البنت في الأول بعتت السيرة الذاتية العادية بتاعتها وقدمت على وظائف على موقع الشركة ولا حياة لمن تنادي. تسكت وتبطل تفكر في حلمها؟ لا طبعاَ. نينا عملت موقع فيه السيرة الذاتية بتاعتها بس مش أي سيرة ذاتية، دي شبه عملت الإنترفيو او مقابلة العمل اللي في خيالها وكتبت تقرير عن طرق تحسين وتطوير الشركة، كل ده على موقع واحد برابط واحد.
وبعدين خدت رابط الموقع وبعتته لرئيس الشركة وكبير طاقم التسويق (صناع القرار) عن طريق ايه….تويتر!
بس خلاص…
البنت مكتبتش سيرة ذاتية شبه أي حد، مركزتش على تعليمها ولا خبرتها، كتبت تقرير كامل عن إزاي Airbnb تقدر تكسب كتير في سياحة الشرق الإوسط من وجهة نظر نينا كصاحبة خبرة في السياحة ذات أصول عربية إتولدت وإتربت في المنطقة.
دي كمان قالت هي عايزة تشتغل ايه في Airbnb. الكلام ده حصل في شهر إبريل اللي فات ومن ساعتها الموقع بتاع نينا مفلح إشتهر في العالم كله من غير ما تصرف دولار واحد على إعلانات.
الإسبوع ده الدنيا إتغيرت، مفلح قالت في حوار مع بيزنس إنسايدر إن Airbnb مشافتش إنها مناسبة للوظيفة بس ده موقفهاش.
قالت إنها زعلت من ده لكنها مسابتش زعلها من الرفض يوقفها في رحلتها والفرص اللي قدامها مع شركات تانية كتير.
عشان اللي نينا مفلح عملته كان مبدع جدا وفي نفس الوقت معتمد على خبرة ودراسة ده غير مباديء التواصل المهني اللي إستخدمتها في التواصل مع صناع القرار، إتعرض عليها مئات الوظائف ومقابلات العمل مع أسامي كبيرة في شركات التكنولوجيا في أمريكا وأوروبا والشرق الأوسط زي Uber و LinkedIn و Dropbox .
أخيراَ الإسبوع ده نينا مفلح إنضمت لشركة Upwork وهي شركة بتساعد الشركات الناشئة والمتوسطة الحجم على إيجاد موظفين بنظام العمل الحر.
طيب نفهم، ليه كل ده بيحصل مع نينا وبقية العالم لا؟
نفهم سوا….
1- أولا نينا نسيت فكرة إنها تبعت سيرتها الذاتية وتقعد إيدها على خدها مستنية المكالمة، هي عرفت الحقيقة الصادمة إن الملايين عايزين شغل وهي لازم تتفرد عنهم وتبقى مختلفة عشان تبان وسطهم.
2- وضحت قيمتها المضافة للشركة اللي هي بتقدم لها، يعني بدل ما تحكي عن شطارتها وقدراتها الشخصية، هي وضحت إزاي هتخلي الشركة تكسب فلوس وتتطور بسبب شغلها. نينا مفلح بتفكر كموظف مش كمتقدم لوظيفة والفرق كبير.
3- نينا درست الشركة وموقفها الأول. عرفت ان Airbnb بتفكر تتوسع في الشرق الأوسط وقدمتلهم خطة ومقترحات وراها دراسات وأرقام عشان ينفذوا ده.
4- نينا خصصت وقتها ومجهودها لهدفها. قضت أيام وساعات في كتابة التقرير وبعدين في بناء الموقع nina4bnb.com. نينا صرفت من جهدها ووقتها وفلوسها عشان توصل لطموحها ومخافتش من ردود الأفعال.
5- نينا إستخدمت أسلوب سهل في الكتابة والعرض عشان درست الناس اللي بتكلمها وعرفت إن دي لغتهم وثقافتهم.
6- نينا إستخدمت تويتر عشان تكلم صناع القرار في Airbnb على حساباتهم الشخصية وبعتتلهم رابط الموقع. متكسفتش ومخافتش من ردود الإفعال، كانت ذكية وعملية في إنها إستخدمت مباديء التواصل المهني الإحترافي بدل ما تستنى مسؤول الموارد البشرية يلاقي سيرتها الذاتية بين الملايين اللي على مكتبه. خبطت على الباب الصح بمساعدة الإنترنت.
ليه مهم تعرف حكاية نينا مفلح؟
فاكر لما قلنالك تبطل تبعت سيرتك الذاتية وخلاص؟ نينا دليل واضح وقاطع على نفس الفكرة، إزاي تستخدم طاقتك الإبداعية وتفكر بره الصندق وتستعين بمباديء التواصل المهني عشان توصل لهدفك.
مستني إيه؟ إدخل على جوبزيلا وكلم صناع القرار في الشركات اللي عايز تشتغل فيها ومتنساش توريهم انت هتعمل ايه للشركة بدل ما تحكي انت عملت ايه في الماضي. فكر كموظف مش كطالب وظيفة.