وأحنا صغيرين كنا دايما بنتسأل: عايز تطلع ايه لما تكبر؟ وكانت معظم الإجابات بتبقى طيار أو ظابط أو مهندس أو دكتور.
بس ياترى لو سألنا الأطفال في المستقبل السؤال دا هيردو بنفس الإجابات؟
بناءا على كلام World Economic Forum التكنولوجيا هي المستقبل وعشان كدة بيقولوا إن مجالات البرمجه والكمبيوتر زي مطوري البرامج ومحللي أنظمة الحاسب على سبيل المثال هتبقى مطلوبة جدا في المستقبل وسوقها هينمو 20% تقريبا بحلول سنة 2025، ودا معناه إن المعرفة التقنية هتبقى أساسية في معظم المهن المستقبيلة.
أما في المجال الطبي الفنيين الطبيين والأطباء المعالجين هيفضلوا محتفظين بمكانتهم الوظيفية و هيزيد الطلب عليهم بالإضافة كمان للـ Workplace Ergonomics – مسئولين الهندسة البشرية ودول اللي مهمتهم الإهتمام براحة الموظف خلال الشغل عن طريق أنهم يتأكدوا أن الكراسي مريحة ، الديكور مريح ، الإضاءة مناسبة وتحسين بيئة الشغل عامةً. ولو بصينا على بيئة الشغل الخاصة بشركات عالمية زي جوجل و فيسبوك هنعرف قد إيه المجال دا مهم وبيأثر على إنتاجية الموظفين وبالتالي مستوى أدائهم هيتحسن في الشغل.
وبالنسبة لمسئولي خدمة العملاء ومسئولين التسويق يعتبروا من الوظائف اللي مش هنقدر نستغنى عنها في المستقبل وبرضه هيزيد نسبة الطلب عليهم من هنا لحد 2025 بس الوظائف المتعلقة بمجال المبيعات نسبة وجودها والإعتماد عليها هتقل قوي مقارنة بالتسويق الرقمي والتطوير في طريقة التسويق و المنصات المستخدمة في الإعلان والترويج، بجانب التدريس والتدريب اللي هيحتفظوا بقيمتهم وهيكون ليهم نصيب من نمو في سوق العمل والطلب هيزيد عليهم، ومعاهم المحاسبين والمدققين. بس أهم الوظائف هي الخاصة بمجال التكنولوجيا، واللي هتبقى مسؤولة عن تطوير كل التطبيقات والبرامج والأجهزة اللي هتخدم كل المجالات التانية وتأمنها. دا غير إن المجالات اللي بتطلب مهارات الإبداع وإبتكار هتتنتشر بشكل كبير في وظائف المستقبل.
أزاي تقدر تستعد للمستقبل؟؟
العالم حوالينا بيتغير ومعطياته بتختلف ولو واجهنا دا بالتجاهل هيبقى مصيرنا بائس ومش هيكون لينا مكان في المستقبل عشان كدة لازم نستعدله كويس ونبقى على علم بكل التغيرات والتوقعات المستقبلية .
مبدأيا التفكير بطريقة مش تقليدية من أهم الخطوات اللي لازم تاخدها عشان تعرف تأهل لنفسك لوظائف 2025 من خلال أنك ماتعتمدش بس على شهادتك الجامعية وتحاول تتطور من نفسك و مهاراتك اللازمة عشان توصل لوظيفة مستقبلية (اضغط هنا واعرف ليه شهادتك الجامعية مش كفاية) . تاني حاجة زي ماقولنا أن التكنولوجيا هي بكرة فلازم تثقف نفسك و تكتسب معرفة و خبرات في مجال البرمجة و علوم الحاسبات و كل الحاجات المتعلقة بالتكنولوجيا الحديثة عشان تكون مستعد لسوق العمل المستقبلي عن طريق الكورسات والتدريب في المجالات المناسبة ليك (جوبزيلا بتضم كورسات مجانية فى مجالات البرمجة ولغاتها المختلفة، اتعرف عليها الآن).
ومانقدرش ننكر أن الوظائف اللي قولنا عليها دي هنحتاجها في المستقبل بس دا مش معناه أنها الوظائف الوحيدة اللي هتبقى موجودة لأن كتير من المهن والوظائف التانية هتفضل موجودة بس مش بنفس القوة. المهم أنه الشخص يبذل المجهود المطلوب في أي وظيفة يختارها عشان يقدر يسيب أثر إيجابي مفيد له وللبشرية كلها.
