بداية حياتك المهنية دائما بتبقى مليانة بحلقات مفرغة كتير. زي مثلا، عمرك واجهت مشكلة لما قدمت على أول وظيفة عشان مكنش عندك خبرة كافية؟ أو عمرك إترفضت في وظيفة عشان معندكش نماذج من شغلك تقدمها مع السيرة الذاتية؟ أنت مش لوحدك! بالرغم من أن معظم أصحاب الشركات بيطلبوا خبرة عملية بسيطة، إلا أن مش كل حديثي التخرج بيبتقى عندهم الفرصة أو الوقت أنهم ياخدوا فترة تدريب قبل ما يتخرجوا. بس متقلقش، في حل للمشكلة ده، أنت لسة قدامك الفرصة إنك تاخد فترة تدريب. جوبزيلا بتقدملك أهم 10 أسباب ليه أنت لازم تاخد فترة تدريب قبل ما تتخرج أو تقدم على أول وظيفة ليك.
1. ابدأ ووسع شبكة اتصالاتك المهنية:
إلى الآن، إنت عندك علاقاتك و إتصالاتك من الناحية الأكاديمية، وده بتشمل دكاترك في الجامعة و أساتذتك اللي عارفين مؤهلاتك وقدراتك. لكن دلوقتي إنت محتاج شبكة إتصالات أكبر تساعدك و تقوي مؤهلاتك لما تقدم على أول وظيفة ليك. أنك تبدا فترة تدريب، ده هيساعدك تشتغل و تتواصل مع مهنيين حقيقيين في مجال عملك. الناس ده هتساعدك تشتغل صح و هيوجهوك خلال فترة تدريبك. بس الأهم من كدة، إنهم هيقدروا يوجهوك للفرص المميزة اللي هتخليك تنجح، و هيقدروا يرشحوك لشبكة إتصالاتهم في مجال العمل، وده هيبدأ سمعة كويسة و قوية عنك تساعدك على التقدم.
2. إتعرف على متطليات الوظيفة:
إنك تشتغل في مجال عمل، أيا كان المجال ده إيه، مختلف تماما عن إنك تدرسه. إنت عارف تخصصك بشكل نظري، بس ده مش كافي، لازم تمارسه بشكل عملي. الممارسة هتخليك تتعود وتعود جسمك و عقلك على ظروف العمل، و متطلباته، و أوضاعه، و مخاطره و مكفئاته. فترة التدريب هتخليك تعيش الحياة اللي إنت المفروض تعيشها لما تتخرج. وده هيساعدك تعرف إزاي تتأقلم وتنجح، وإيه الأخطاء اللي لازم تتجنبها، وإيه التطورات اللي لازم تحققها في نفسك.
3. مارس مجال عملك:
لما بتكون في الجامعة، بتقول للناس انك بتحب تخصصك، و قد إيه إنت مبسوط عشان هتشتغل في المجال اللي بتحلم به. فترة التدريب بتخليك تجرب فعليا إنك تعيش “الحياة اللي إنت على طول بتحلم بها.” صحيح إن ده ممكن يبان حاجة كويسة، بس فيه ناس بتغير تخصصاتها و تحول لمجالات تانية بعد لما بتخلص فترة التدريب، لإنهم بيكتشفوا إن مش هو ده اللي عايزين يعملوه، وإنهم ممكن يكونوا فهموا مهاراتهم و قدراتهم غلط. بعض الأشخاص أحيانا بيكتشفوا مجالات جديدة و بيتعرفوا على فرص مفكروش فيها قبل كدة. عشان كده، إنك تجرب تشتغل في مجالك مش بس بيساعدك تتعرف على طريقة الشغل، لكن كمان بيساعدك تقرر إذا كنت عايز تشتغل الوظيفة ده لبقية حياتك و لا لأ.
4. ارسم طريقك لوظيفتك الاولى:
إنك تبدا فترة تدريب بيديك أول خبرة عملية ليك، وده بيسهلك طريقك لأول وظيفة. أحيانا، الشركات اللي إنت بتتدرب فيها، بتعرض عليك وظائف دائمة في الشركة، سواء بدوام كلي أو جزئي، بعد ما تخلص فترة تدريبك. أحيانا بيفضلوا الناس اللي إتدربوا عندهم عشان جربوا شغلهم و عرفوا كفائتهم. فمين عارف؟ ممكن مكان تدريبك يتحول لأول شركة تشتغل فيها. فاختار كويس المكان اللي عايز تبدأ فيه.
5. جهز نماذج لشغلك، و ابدأ ملفك المهني:
بغض النظر عن مشاريعك و أبحاثك اللي عملتها في الجامعة، إنت لسة محتاج نماذج فعلية لشغلك. ولإنك لما بتبدأ في فترة تدريب بيعتبر إنك بتشتغل في مكان عمل بمهام حقيقية، ده بيديك الفرصة إنك تبدأ ملف مهني خاص بيك. ممكن تجمع فيه صور من الشغل اللي اشتغلته، و المشاريع اللي نفذتها، و أي شهادات تقدير حصلت عليها خلال الفترة ده. كل ده هيضيف لسيرتك الذاتية، وهيديك الافضلية على مرشحين تانيين لو مقدمين على نفس الوظيفة.
6. احصل على توجيه لأدائك في العمل:
صحيح إنك خلال فترة التدريب هتتعامل كموظف عادي، إلا إن مديرك و زملائك في العمل عارفين إنك لسة بتتدرب وده هيخليهم يساعدوك و يوجهوك من خلال شغلك. كل فترة هيجليك نصيحة أو مساعدة عشان تشتغل أحسن و تتعلم مهارات أكتر، و تعرف معلومات تقوي مؤهلاتك و قدراتك في الشغل. ومن ناحية تانية، إنت عندك مساعدة متوفرة ومتاحة ليك طول مدة تدريبك، تقدر تحصل فيها على المساعدة اللي محتاجها عشان تتقدم في شغلك و عشان تحل المشكلات اللي بتواجهك.
7. إتعلم المهنة الحقيقية:
عمر المعرفة النظرية ما كانت كافية إنها تعرفك على تفاصيل المهنة. حتى لو درست نماذج لمهنيين في المجال، أو درست نماذج لشركات ناجحة في مجالك، بردو مش هتقدر تجمع فكرة دقيقة عن مجال عملك. من ناحية تانية، كل الصناعات النهاردة بتتطور بسرعة و بتحصل فيها تغيرات كتير. من خلال فترة التدريب، هتتعرف على أخر الاخبار، وأحدث التطورات في مجال العمل. وده كمان هيساعدك إنك تتعرف على التخصصات المختلفة في مجال شغلك و هيوسع المجالات اللي مفتوحة قدامك.
8. كن مهني قبل ما تتخرج من الجامعة:
إنك تكون مهني في مجال عملك مش معناه إنك قعدت أطول فترة بتشتغل فيه. المهنية ممكن تكون بجودة التعليم اللي اتعلمته، و بتعرفك و إلتزامك بقواعد و أخلاقيات العمل، والشغل اللي أنت عملته في مجالك. إنك تاخد فترة التدريب ده بيديك الافضلية، و بيقدمك على اللي إتخرجوا معاك، و بيساعدك تبدأ طريق المهنية قبل ما تشتغل،و بكدة توصل للنجاح أسرع.
9. إبني قاعدة بيانات لمصادرك الخاصة:
وإنت في فترة التدريب، ابدأ إبني قاعدة بيانات خاصة بيك، سجل فيها كل المهنيين اللي إتعرفت عليهم في مجال شغلك، الكورسات اللي ممكن تاخدها و تقويك، المنظمات و الشركات اللي ممكن تشتغل فيها، التدريبات اللي ممكن تعملها، أو حتى المواقع و المدونات اللي لازم تتابعها. أي معلومة تحصل عليها هتكون إضافة ليك و لخبرتك. و هتتفاجئ إمتى ممكن تحتاجها و تستخدم المعلومات ده.
10. إبني لنفسك الافضلية:
صحيح إنك تحصل على درجات عالية و تفوز بأعلى المراكز في الجامعة هيفيدك في سيرتك الذاتية، بس مفيش حاجة هتجذب أصحاب الشركات ليك أكتر من خبرتك العملية. فلو في إتنين عندهم نفس الإنجازات الجامعية، و نفس التوصيات من أساتذتهم في الجامعة، أصحاب الشركات هيختاروا اللي عنده خبرة أكتر.
