الشغل اللي عملته على جوبزيلا نجح ومشيت معاك وجاتلك المكالمة و هتروح أول انترفيو ليك في التاريخ من ساعة ما إتخرجت.
دلوقتي تعمل إيه؟
تعرف على دليل جوبزيلا الكامل للنجاح في أول انترفيو….
المكالمة
متسألش مليون سؤال. ليه؟ عشان اللي بيكلمك مش هو غالباَ اللى هيعمل الإنترفيو. اللي بتتصل بيك بتكون غالبا مديرة المكتب وأكيد مش عارفة كل تفاصيل الوظيفة. لكن من حقك تعرف الأتي: إسم الشركة، عنوان الشركة، اليوم والساعة، القسم اللي هتشتغل فيه وإسم الشخص اللي هيعمل معاك الإنترفيو، متنساش تكتب كل حاجة في ورقة فوراَ.
جَمع شوية معلومات
جوجل صديقك الصدوق هنا، دورعلى الشركة وشوفها بتشتغل في إيه وأهم إنجازاتها وعملائها. جرب تفتح جوبزيلا وتدور على إسم الشخص اللي هيعمل الإنترفيو معاك، شوف إتخرجوا منين، إشتغلوا فين، إنجزوا في إيه مهنياَ. بس إنك تعرف متجوزين مين على فيسبوك ميتحسبش.
تلبس إيه؟
إعمل شوية أبحاث. شوف الشركة نظامها إيه في المظهر. يعني مثلا، بعض الشركات بتطبق سياسة “الكاجوال شيك” اللي مسموح فيها بالجينز لكن فيه شركات بتطبق سياسة “الفورمال” أو “الرسمي”. إختار لبس الإنترفيو على حسب سياسة الشركة عشان ميكونش شكلك مش لايق على المكان خاصة إن ده بيدل على إحترامك للمكان وثقافته.
نصيحة للبنات: بصرف النظر عن سياسة اللبس في الشركة، إبعدي عن المكياج الزيادة وألوان الحجاب واللبس الفاقعة أو الصارخة. كل ما كانت الدنيا معتدلة وهادية كل ما كان أحسن.
فرق التوقيت
لازم توصل قبل ميعاد الإنترفيو بربع ساعة على الأقل. وإحتياطي عشان ممكن يتطلب منك تملى إستمارة الموارد البشرية، هات قلمك معاك.
خد بالك من لغة جسمك بس مش أوي
لغة جسمك بتبين مشاعرك تجاه نفسك وتجاه المكان اللي انت فيه بصورة لا إرادية. إمشي وضهرك مفرود وإبتسم بس متبقاش شبه الجوكر بتاع باتمان. هدي أعصابك وركز على هدفك.
إسأل إسئلتك براحتك
كل خبراء الموارد البشرية اللي سألناهم، إتفقوا على شيء واحد وهو إنهم بيحترموا مرشح الوظيفة اللي بيسأل عن الشركة والوظيفة مش جاي يتسئل بس أو بيتعامل مع الإنترفيو على إنها إمتحان.
تفاوض على مرتبك
فاكر لما شرحنالك إزاي تتفاوض على مرتبك؟ متنساش إنه مينفعش تتجاهل أو تهرب من سؤال المرتب. الحركة دي مش تمام.
متخافش من إنترفيو المدفعية
اللي هي لما اللي يعمل معاك الإنترفيو بيسألك مليون سؤال بسرعة ورا بعض، الطريقة دي بتُستخدم عشان يعرفوا مخك بيشتغل إزاي تحت الضغط النفسي. خد نفس عميق ورُد على كل سؤال يجيلك. ومتنساش، قول معرفش عادي ومش هتخسر إحترام اللي قدامك لكن من فضلك، متفتيش.
بلاش ” ممكن أعرف الجوب تايتل قبل ما أجي؟”
لو إنت حديث التخرج، كلمة “جوب تايتل” أو المسمى الوظيفي مش المفروض تكون أول إهتماماتك وسؤالك عليها بيقلل من فرص وصولك للوظيفة أساساَ. المهني الحقيقي مش هيهمه إسم الوظيفة أد ما هيراعي إنه يسأل على ملامحها ومتطلباتها وإذا كانت ملائمة لطموحاته وطبيعة دراسته.
فين العقد؟
نقول مبروك؟ طيب فين العقد؟ دي مش قلة ذوق ولا حركة مش مهنية زي ما إنت فاكر. من حقك تشوف نسخة من العقد وتقراه وتفهمه وتمضيه قبل ما تعمل اي حاجة. لو قريت العقد ومفهمتش جزء إطلب تفهمه. دي حقوقك اللي بيكفلها ليك القانون. وإتأكد من إن مهام وظيفتك ومرتبك والمطلوب منك تنفيذه كلهم مكتوبين في العقد.
عارفين والله إن فكرة حديث التخرج دي في سوق العمل شبه غزال شارد دخل غابة الأسود فجأة، جمد قلبك. إتعلم من أخطائك ومتخافش من الفشل أو الرفض. خليك واثق في نفسك وقدراتك واللي هتقدمه لأي شركة. متنساش بس إن كلنا لازم نبدأ من مكان ما، فمن فضلك، إبدأ النهاردة معانا.
إيه كانت أكتر لحظة مضحكة مريت بيها في أول إنترفيو ليك؟ إتصرفت إزاي؟ إحكيلنا على تويتر دلوقتي بهاشتاج #InterviewOne