عمرك حسيت أنك مش عايز تخرج تاكل في مكان معين، بالرغم من أنك بتحب أكله، لأنك بتكره الموقع أو جو المطعم؟ أو عمرك رفضت تروح حفلة معينة عشان الناس اللي فيها، أو أجواء الحفلة؟ أحيانا الموظفين بيجيلهم نفس الإحساس وهم رايحين الشغل كل يوم. معظم الموظفين بيحبوا شغلهم، و بيكونوا عايزين يحققوا إنجازات أكتر في مجال عملهم، لكن الشركة، أو ما يعرف ب” بيئة عمل” مش بتشجعهم أنهم يعملوا كدة.
وصحيح أن أصحاب الشركات بيكونوا عايزين يشجعوا موظفينهم على أنهم يشتغلوا أحسن و يزيد نجاحهم و إنتاجيتهم في الشغل، إلا أنهم مش بياخدوا بالهم أن التحفيز مش بس بيكون على شكل ترقيات أو زيادات في المرتب. في بعض الأحيان، كل اللي بيكون مطلوب من أصحاب الشركات هو أنهم يوفروا بيئة عمل ودية و يخلقوا جو يساعد الموظفين أنهم يقوموا كل يوم الصبح بدري و يؤدوا وظيفتهم، حتى لو كان الشغل صعب و كتير. جوبزيلا بتقدملك دليل يساعدك على خلق أكتر بيئة عمل تخلي الموظفين مبسوطين، وده شيء بالتأكيد هيقوي الشغل و يطوره.
في البداية، خلي موظفينك يحسوا بالحاجات ده وإخلق بيئة عمل فيها التصرفات دي:
1. أن دي شركتهم، و عشان كده هتطوروها مع بعض:
حاول دائما تسأل الموظفين على رأيهم و مشاركتهم. حسسهم أنهم جزء من الشركة، و عشان كده رأيهم مهم عشان تبنوا شركة قوية، و مكان عمل مناسب للكل. ده مش معناه أنك هتوفرلهم كل حاجة بيطلبوها، بس حاول تخليهم مستريحين على قد ما تقدر، ما دام ده مش بيأثر على مهنية العمل، أو احترام المكان.
2. دي قواعد الشركة و مبادئها السلوكية:
أنك تبني شركة أو مكان عمل، بيتطلب منك، كصاحب الشركة، أن يكون عندك رؤية واضحة هتحدد الطريقة اللي هتدير بها الشركة و تتعامل مع موظفيها. الشركة الناجحة هي اللي بيكون عندها قواعد و قوانين واضحة بتحدد نظام الشركة، و توجه علاقات الموظفين و تعاملاتهم. ومن ناحية تانية، لما بتحط مباديء سلوكية معروفة، الموظفين بيعرفوا اللي مطلوب منهم، و بيقدروا يحددوا حقوقهم وواجباتهم. بعض الشركات بتكتب على حيطة المكتب أهم المباديء اللي بيتميزوا بها عشان تفكر بها الموظفين على طول، و تفتخر بهم.
3. إحنا فريق واحد، وهنخلق ثقافة مميزة لينا:
أي مبني بيتحدد قوته بقوة أساسه و القاعدة اللي اتبنى عليها. و أي شركة عشان تكون ناجحة لازم تكون معتمدة على اتحاد وقوة ترابط فريق العمل. زي ما العمود الفقري بيسند جسم الإنسان، فريق العمل القوي هو اللي بيساعد الشركة أنها تتجاوز مراحل الفشل، و تحقق نجاحات كبيرة. عشان كدة فريقك بيمثل الأدوات اللي هتحدد بها طريقك للنجاح، و هتتصدى بها للمشكلات و العقبات. لكن الموضوع في إيدك، كصاحب الشركة، أنك تكون دعم قوي لشركتك و لشغلك. ومن ناحية تانية، الموظفين هيراقبوا الطريقة اللي بتتعامل بها معاهم ومع العملاء، ومن خلالها هيفهموا أسلوب الشركة و هيقلدوه. عشان كدة المفتاح معاك، أنت تقدر تكون جو عمل ودي بيساعد على التعاون، أو مكان مليان حقد و تعب وقلة مساواة.
4. إحتفلوا مع بعض:
حاول تخلي الموظفين يحسوا أنهم أسرة واحدة. استغل أي فرصة في إنك تتعرف عليهم، تتعاطف معاهم في أحزانهم، و تشاركهم أفراحهم. متتدخلش أوي في حياتهم، بس خليك موجود لما يحتاجوك. من ناحية تانية، جمعهم مع بعض في المناسبات المختلفة زي رمضان، رأس السنة، الأعياد، شم النسيم، و غيرها، و إحتفلوا مع بعض. حاول تنظم بعض الحفلات برة المكتب، أو اتجمعوا كلكم عشان تتغدوا أو تتعشوا مع بعض. دائما إعلن عن نجاحات الشركة و إنجازاتها، أو حتى النجاحات الشخصية للموظفين.
5. حدد خطط للتقدم الوظيفي:
بين للموظفين أنك عندك خطط للتطور و أنك مش ناوي تفضل في نفس المكان لفترة طويلة. ارسم الأحلام المتعلقة بالشركة و بمجال الشغل، و شاركهم في التقدم اللي بتحققه الشركة و نجاحها. عرفهم على الإنجازات اللي حصلت، و العقبات اللي اتخطتوها. ولأنهم جزء من الشركة، لازم يكونوا جزء من نموها و تقدمها، و ده هينعكس على تقدمهم و تطور شغلهم.
6. إخلق بيئة عمل صحية:
كل النقاط اللي فاتت لازم تخليها في بالك لأنها بتأثر على الحالة النفسية للموظفين في مكان العمل. لكنك لسة محتاج أنك تشتغل على العوامل المادية و لوازم المكتب و مكان العمل. ركز في الحاجات ده، وحاول أنك توفرها في الشركة على قد ما تقدر:
– إختار مكان كويس:
موقع الشركة بيعتبر عامل مهم جدا بيأثر في الانطباع و الطريقة اللي بيفكر بها الناس و بيميزوا شركتك. حاول تختار مكان يسمح لشغلك بالتقدم، و للشركة بإنها تتوسع و تتطور. حط في بالك كمان أن المكان يكون سهل و يقدر الموظفين و العملاء أنهم يوصلوله. من ناحية تانية، لو الشركة في مكان جميل، وله منظر مطل على أشجار و طبيعة، ده أكيد هيحفز الموظفين و هيشجعهم على الشغل.
– إهتم بالتنظيم و الديكور:
مكان العمل لازم على طول يكون منظم و نضيف. الشركة لما تكون مش مترتبة، الموظفين مش هيقدروا يشتغلوا صح. والأهم من كدة أن العملاء مش هيرضوا يتعاملوا مع الشركة أو موظفينها. فكر كمان في احتياجات مكان العمل سواء كانت مكاتب، كراسي أو حتى زينة. نظم المكاتب في مساحة الشركة بحيث أنهم ميكونوش قريبين أوي من بعض و يزعجوا الموظفين، و لا بعاد أوي فيقللوا التواصل بين فريق العمل. حاول تضيف بعض الديكورات و الزينة عشان تخلق مكان جميل يشجع على العمل، بس متحطش حاجات كتير عشان متسببش زحمة.
– الشبابيك و الإضاءة:
الإضاءة الطبيعية غالبا بتكون منعشة ومحفزة للموظفين أنهم يشتغلوا و يخلصوا المهام اللي عليهم. عشان كدة حاول أن المكتب يكون في شبابيك كتير على قد ما تقدر، لأنها كمان بتوفر هواء نقي و مناظر طبيعية. من ناحية تانية، لازم تتوفر إضاءة قوية طول ساعات العمل. سواء كان نور طبيعي، او إضاءة مصابيح، أهم حاجة أن الموظفين مايعانوش من ضلمة في المكان.
– تهوية جيدة:
مفيش حاجة تساعد الموظفين على أنهم يريحوا ويفصلوا خلال شغلهم غير الهواء النقي. لكن ده ميمنعش وجود أجهزة تكيف للتخفيف من الحرارة خاصة في أيام الصيف. أحسن حاجة ممكن تعملها هي إنك توفر الحاجتين: يكون في شبابيك و مكيفات في مكان العمل عشان توفر تهوئة كويسة تساعد الموظفين على التركيز.
– مطبخ و منطقة للراحة و الترفيه:
لأنهم بيشتغلوا لساعات طويلة، الموظفين محتاجين أنهم يحافظوا على تركيزهم و نشاطهم عشان يخلصوا شغلهم. وده هيخليهم يحتاجوا ياكلوا و يشربوا ماء و حاجات سخنة زي شاي و قهوة كل شوية. عشان كدة وجود المطبخ حاجة مهمة في الشركة، و لازم يتوفر فيه تلاجة، و ميكرويف أو فرن صغير، زائد الحوض ومكان للكوبايات و الأطباق. من ناحية تانية، حاول تخصص غرفة صغيرة للترفية، ممكن يلعب فيها الموظفين، يتكلموا مع بعض، أو حتى يرتاحوا لفترة قصيرة. ده هيقوي العلاقات ما بين فريق العمل، و هيزود ولائهم للشركة و للشغل.
احكيلنا عن أكتر الحاجات اللي بتعجبك في المكان اللي بتشتغل فيه، على هاشتاج #وأنا_في_الشغل، و ابعتلنا قصصك أو صورك على جوبزيلا، فيسبوك، تويتر، إنستاجرام، يوتيوب، و بينترست.
