دي الخدعة اللي خدعونا بيها من و إحنا صغيرين، و قعدنا نفكّر كلنا في إجابة السؤال ” يا ترى العلبة دي فيها إيه ؟ ” بس الحقيقة إن كل الحاجات المهمة و المبدعة ، طلع مكانها برّه العلبة .. لو الاكتشاف ده بالنسبالك متأخر، فإحنا هنقولك إزاي تقدر توصل للإبداع اللي برّه العلبة ..
مبدئياً، الإبداع مش معناه ، خلق فكرة من العدم زي ما بيعتقد البعض ، و الموضوع مش مقتصر على فئة معينة من الناس .. لكن هو عبارة عن اتصال بتقدر تعمله بين أفكار و أشياء موجودة حواليك ، و عشان كده الموضوع مش صعب … هو بس محتاج إنك تبص لكل الحاجات التقليدية بطريقة مختلفة عشان تطلع منها بنتيجة و فكرة عبقرية أو زي ما بيسموها ” بره الصندوق “.
طب إزاي تكون مبدع ؟!
الخيال:
حاول تتخلص شوية من الواقعية، و تفك اللجام عن خيالك و تطلق سراحه، يعني مش لازم يكون تفكيرك ” منطقي ” في كل حاجة، غمض و إتخيل إنك كائن فضائي، بتقدر تكتشف الظواهر الكونية قبل ما توصل للكوكب، و بتتعامل معاها، بعدين بتدخل المكوك بتاعك تاخد الـ Black coffee و تنام سنتين و تخرج تكمل سباحة في الهواء.
أو اقضي نص ساعة من وقتك كل يوم، في إنك تفكّر إزاي الورقة بتدخل جوا سلك الفاكس و بتوصل للشخص المستقبل مفرودة؟؟
الإلهام:
عشان تكون مبدع أو تقدر تطلع بأفكار خلاقة، لازم تركز على ” الإلهام “، إنك تقدر تستلهم قصة من كل حاجة حواليك، أو فكرة من أبسط الحاجات اللي بتحصلك او بتشوفها، مثلاً لو فيديو اتفرجت عليه ، أو speech سمعتها ، أو موقف حصلك في الميكروباص و إنت رايح الشغل، أو شخص حواليك قال كلمة أو إفيه و علّق معاك، كل دي حاجات ممكن تطلع منها بأفكار مبدعة.
التفكير :
على عكس اللي إنت فاهمه، الإبداع مش محتاج منك إنك تفكّر و تعصر دماغك طول الوقت، أول ما تكون بتدوّر على فكرة مبدعة، بطّل تفكّر فيها هي بالذات، و ابدأ اعمل حاجة تانية أو فكّر في حاجات تانية، بعيدة تماماً عن الموضوع، الفكرة هتنط فجأة في دماغك و تنوّر.
الروتين :
الروتين بيقتل كل حاجة حلوة، عشان كده كل يوم اعمل حاجة جديدة و مختلفة مهما كانت بسيطة، حتى لو هتمشي من شارع تاني، غير اللي بتروّح منه كل يوم، يمكن في الشارع ده، يصيبك الإلهام، و تنوّر في دماغك الفكرة.
الممارسة :
زي أي عضلة في جسمك، الإبداع ممارسة، كل ما تتمرن عليه أكتر و تشغّل عقلك أكتر، كل ما إتطورت فيه، و بقى عندك سرعة بديهة و تقدر تلاقي الفكرة بوقت و مجهود أقل.
الموسيقى :
ماتستغربش، دي حقيقة، علماء كتير أثبتوا إن الموسيقى، ليها تأثير كبير على الدماغ البشرية، لأنها مش بس بتقدر تحفز و تقوي الذاكرة و تنشّط المخ، لكن مان هي عامل من عوامل تحفيز الإبداع و مراكز التفكير، عشان كده ماتنساش تشغّل track حلو و إنت بتشتغل و عايز تطلع بفكرة حلوة.
قولنا إنت كمان خلطة الإبداع الخاصة بيك، و إزاي بتقدر تخرج برّه العلبة، ولو استفدت من المقال ده، اعمل Share و وصّله للي حواليك 🙂
